- A Consellería do Mar, a través do CETMAR, impulsa novas solucións tecnolóxicas para o seguimento da mexilla
O proxecto APROMEX deu un novo paso adiante na mellora do coñecemento e da xestión do mexillón galego coa celebración da xornada Avances do proxecto APROMEX, que tivo lugar o pasado 19 de novembro de 2025 na Casa da Cultura – Auditorio Valle-Inclán de Vilanova de Arousa. O encontro, organizado polo Centro de Investigacións Mariñas (CIMA) e o Centro Tecnolóxico do Mar CETMAR, permitiu presentar os progresos máis recentes do programa e outras iniciativas impulsadas pola Consellería do Mar no ámbito da acuicultura e do estudo do mexillón nas rías galegas.
Durante a sesión expuxéronse os resultados da precampaña 2025–2026, que permiten avaliar a cobertura e a densidade de mexilla nas principais zonas produtoras. Estes datos resultan fundamentais para planificar con antelación a campaña de extracción.
Un dos puntos destacados da xornada foi a presentación dos traballos realizados no sistema long-line, desenvolvidos na Ría de Muros e Noia, co obxectivo de testar novos métodos de captación de mexilla no medio natural e avaliar a súa viabilidade.
O proxecto tamén incorporou ferramentas dixitais innovadoras, como o visor da densidade larvaria de mexilla, que facilita a consulta en tempo real da presenza larvaria nas rías galegas. Estas aplicacións contribúen a mellorar a planificación e a eficiencia da actividade produtiva.
A Consellería do Mar deu a coñecer, ademais, outras iniciativas complementarias. Entre elas, a nova versión da aplicación MOVTIC, que simplifica a xestión documental vinculada á actividade acuícola; o proxecto BATEAS, centrado na análise das condicións ambientais que inflúen na produtividade do mexillón; e a iniciativa CAPACITAMEX, que promove encontros coas asociacións de produtores para compartir avances técnicos e fomentar a transferencia de coñecemento entre administración e sector.
A xornada, celebrada a partir das 16:00 horas, incluíu espazos de debate e intercambio de impresións entre profesionais do sector, investigadores e representantes institucionais.